Kutsidazu bidea, Ixabel

 

Hernialde eta Alkiza herri artean, Joxean Sagastizabalek 1994an argitaratu zuen eleberri ospetsuan oinarritutako ibilbidean, euskal literatura eta natura uztartzen dituen parajeak ezagutuko ditugu. Juan Martin donostiar gazteak, Hernialdetik Alkizako barnetegira, euskara hobetzeko asmoz, egunero egiten zuen bidea ezagutuko dugu.

Ibilbidearen ikurra Hernialdeko plazan

Hernialdeko udaletxea eta Jasokundeko Ama Birjinaren elizaren aurrean dagoen plazan emango diogu hasiera ibilaldiari. Plaza honetan ikusiko dugu lehen aldiz ibilbidearen bide-sinbolo berezia  izango dena: lau hortzetako sardea. Ibilbide osoa oso ondo seinaleztatuta dago, eta, bide-seinale hauekin batera, eleberriarekin zerikusia duten zenbait gune ikusiko ditugu.

Pertsonaien enborra 

Gurutze-bidean zehar, Txingurri bailara aldera abiatuko gara. Lehen bidegurutzera iristean, Lizarbakarrera zuzentzen den bidea utzi (PR-Gi 80), eta, lau hortzetako sardeak erakusten digun norabidean jarraituko dugu. Laster iritsiko gara lehen gune berezira, kalbarioaren ondoan etzanda dauden enborren ondora. Eleberriko pertsonaien protagonisten izenak agertzen dira; Ixabel indigena eta Juan Martin kalekume euskalduberriarrenak (316 m, 10 min).

Esaldien enborrak

Lehen gune berezi hau atzean laga ondoren, galtzada zaharrean zehar jarraituko dugu hurrengo bide tartea. Basoan murgilduko gara, eta, pista zabal eta erosoan zehar, bi herrien arteko mugan dagoen lekuan, bigarren gunera helduko gara. Zutik jarritako zortzi enborretan dauden eleberriaren paragrafo eta esaldi batzuk irakurri ahal izango ditugu. Bakoitzean agertzen den QR kodearen bidez, hiztegi eta bestelako erreferentziei buruzko informazioa jaso daiteke (291 m, 20 min).

Arritzagako informazio gunea

Alkizako lurretan barneratu eta Arana bailara iritsiko gara. Lehen baserrien ondora iristean, Arritzagako informazio gunea ikusiko dugu. Erdi etzanda dauden sei enborretan, eleberriaren hiztegiarekin zerikusia duten hainbat hitz eta esamolde agertzen dira (233 m, 40 min). Mandabe errekaren gainetik pasa, errepidean zehar metro batzuk bete, eta, Urruzola upategia aldera igotzen den bidea hartuko dugu. Lau hortzetako bide-seinaleek erakusten duten bideak mahastian barneratuko gaitu, eta, ataka bat gainditu eta gero, lurrezko pistan barrena aurrera egingo dugu (305 m, 1 h).

Bide-seinalea

Antzieta baserria

Kilometro erdi pasatxo bete beharko dugu Etxabetxiki baserriaren ondoraino iristeko. Aurrera eginez, Hernio-Gazumeko mazizoaren magalean dagoen Alkiza herriaren ikuspegi osoa edukiko dugu, ederra oso. Zementuzko bideak, Santiago ermitaren eta, honi atxikita dagoen hilerriraino eramango gaitu. Gertu dugu herrigunea, eta etxea artean ibiliz, San Martin eliza eta udaletxearen aurrean dagoen plazara iritsiko gara (334 m, 1 h 25 min).

Hernioko gailurreria eta Alkiza herria

Alkizako San Martin eliza

Plazan, ibilbideari buruz argibide-taularen dagoen lekutik Arana bailararen ikuspegiaz gozatu ondoren, Anoetara jaisten den errepidean zehar beteko dugu hurrengo tartea. Herritik atera aurretik, lau hortzeko sardea duen bide-seinaleak errepidea utzi behar dugula erakutsiko digu. Xendaren hasieran, ibilbide honen azken informazio gune berezia ikusiko dugu. Zutik jarritako egurrezko lau enborren goiko aldean eleberriari buruzko informazio desberdina irakurri ahal izango dugu (324 m, 1 h 35 min).

Argibide-zutoinak

Xendak errepideraino eramango gaitu. Errepidean zehar jaisten jarraitu, eta, gure eskuinera Antzieta baserri utzita, Alkizara igotzeko hasieran erabili dugun ibilbidearekin bat egingo dugu. Hernialdera bueltatzeko bidea, dagoeneko ezagutzen dugu (307 m, 2 h 15 min).

Powered by Wikiloc