Lapurdiko
mendi hau oso berezia da arrazoi askorengatik. Makina bat bidek bertara
igotzeko aukera eskaintzen digute eta bere tontorretik dagoen ikuspegia zabala
da oso. Hala ere esan behar da oso humanizatuta dagoela eta seguruenik Euskal
Herriko tontorrik turistikoena da, batik bat Napoleon III.arekin ezkonduta
zegoen Eugenia de Montijo enperatrizak modan jarri zuenetik. Bere omenez,
1912an “Le Petit Train” kremailera-trena eraiki zen, San Inazio lepotik abiatu
eta turistaz beterik tontorretik oso gertura igotzen dena. Geltokiaz gain, TB
errepikagailu erraldoia, orientatzeko mahai bat eta bertan jan eta oroigarriak
erosi daitezkeen pare bat benta. Egun eguzkitsuetan jendez mukuru egoten da eta
zaila da isiltasuna eta lasaitasuna izatea.
900 metroko altuera duen mendi honek bi ezaugarri ditu.
Lehena bere ikuspegi zabala da, bertatik Lapurdi eta Bidasoako inguruak ederki
ikusteaz gain, Pirinio eta euskal mendi askoren tontorrak identifika daitezke.
Bigarrena, berriz, tontorra desitxuratzen dituzten bentak eta antenak. Hala
ere, eguraldia lagun, mendi, kostalde eta bestelako paisaiaz gozatuko dugu.
Dauden sarbide desberdinetatik, Berakoa aukeratu dut, askoz jende
gutxiago ibiltzen baita, eta, gehienetan, bakardadean betetzen da igoera eta
jaitsieraren tarterik handiena. Landagañetako leporaino igo naiz auzo eta etxe
ederren artean irekitzen diren porlan eta lurrezko pisten barrena. Basoak
atzean utzita, malda piko eta gogorrari ekin diot, lehenik Larhun txikiko
tontorreraino, eta, gero, Zizkuitzeko lepora jaitsi eta aurrez aurre dagoen
azken igoera gogorrari ekin diot. Kostata, baian azkenean tontorrera heldu
naiz.
Jendez mukuru dago, turistez josita bazter guztiak, beraz,
zintzurra freskatu eta mokadutxo bat hartu ostean, mugarrien ondotik abiatu
naiz beherantz. Berehala iritsi naiz Athekaleunetik gertu dagoen pasora.
Altuera erraz galdu dut belardi eta garo artean zabaltzen bide erosoan zehar.
Aldats pikoenak jaitsi ostean, Kondendiagako lepoan dagoen Benta Beltzara
iritsi naiz. Beste atseden txiki bat belaunek jasan duten “zigorra”
errekuperatzeko.
Bide zabal eta nabarmenak Lizuniagako mendateraino eramango gaitu,
eta, errepidea zeharkatu ondoren, baso, auzo, baserri eta erreken ondotik
igaroko gara abiapuntura heltzeko.
No hay comentarios:
Publicar un comentario