Otzarretatik Ugunako ur-jauzira

Powered by Wikiloc

 

Hamaika dira Euskal Herriko parke naturalik handiena den Gorbeiako lurretan ezagutu ditzakegun bazterrak. Ibilaldi erraz hau burutuz gero, horietako hiru bisitatuko ditugu: Otzarretako pagadia, Ugunako ur-jauzia eta Saldropoko hezegunea. Sasoiaren arabera aurpegi desberdina erakusten dute, baina seguruenik udaberria da urtarorik onena bakoitzaren postalik ederrenaz gozatzeko. 

Ibilbidea Otzarretako aparkaleku txikitik abiatzen da, pagaditik oso gertu. Baso-pista batetik abiatu eta berehala murgilduko gara pagadian. Azken urte hauetan, baso txiki, baina ikusgarri hau, Bizkaiko txoko bisitatuenetako bat bihurtu da. Ehun urte baino gehiago dituzten pagoen artean Zubizabala errekaren ibilguak itxura berezia ematen dio pagadiari, argazkilarientzat gutizia bihurtuz. Pagoen adarrak zerurantz zuzentzen dira argimutil edo ganderailu gisa, garai batean ikazkintzak inguru hauetan izan zuen garrantziaren lekuko. 

Pagadian zehar doan tarte txiki eta zirkularra osatu ostean, baso-pistara itzuli eta Saldroporantz zuzenduko gara. Hesia igaro, aska baten ondotik pasa eta belardian barrena jarraituko dugu basetxetik gertu dagoen pistara ailegatzeko. Ehunen bat metro bertatik bete eta bidegurutzera iristean ezkerreko pista aukeratuko dugu. Bide erosoak pinudian barneratuko gaitu Saldropoko hezegunea hegoaldetik inguratzen dugun bitartean. Errekarteko karobiaren ondoan dagoen beste bidegurutze batera iritsiko gara. Aurrera jarraituz gero, Saldropoko atsedengunera helduko ginateke, baina hau utzi eta ezkerretik jarraituko dugu egurrezko zubitxo batek Ugunaga erreka igarotzen lagunduko digularik.

Ibilbidea ez dago balizaturik eta tarte honetan hiruzpalau bidegurutze aurkituko ditugunez, egokia litzateke GPSa erabiltzea. Beste pinudi batetik ateratzean, erreka bat zeharkatu eta ur-jauziak ateratzen duen hotsak gertu gaudela erakutsiko digu. Zuhaitz artean aurrera segitu eta harri-piloak ur-jauzira jaisten den zidorra erakutsiko digu.  Jaitsiera oso pikoa da eta erne ibili behar da hezea dagoenean irrist ez egiteko. Pago bikainen  artean ur-jauziaren oinera iritsiko gara, Gorbeiako parke naturalak bere altzoan gordetzen duen altxorretako  bat. 

Inguruaz gozatu eta gero, jaitsitako bidetik atzera egingo dugu eta harri-piloen ondora ailegatzean ezkerretik jarraituko dugu iparralderantz. Bidegurutze pare bat atzean utzi ondoren, asfaltozko bidera igoko gara. Errepide txiki honetatik jarraituz berehala iritsiko gara Saldropoko aparkaleku, atsedengune eta hezegunea kokatuta dauden ingurura. Argibide-tauletan hezeguneari buruzko informazioa jaso eta baso-pistatik erraz egingo dugu aurrera. Atsedenlekua ezkerrera utzita, Saldropoko hezegunearen parera helduko gara.

Saldropoko lautadaren erdigunean dagoen hezegunea oso ekosistema berezia da eta balio ekologiko itzela du, urarekin lotutakoa. Bertan, landaredi anitza eta berezia baitago. Garai batean, XX. mendearen erditik aurrera, lur hauetan hiru hektareako azalera zeukan zohikaztegi bat ustiatzen zen. Gure eskuinean hezegunea utzi, baso-pistan barrena jarraitu eta bat egingo dugu  ibilaldiaren lehen zatiarekin, basetxetik gertu. Belardia berriro zeharkatu eta abiapuntura itzuliko gara.

 

Klikatu hemen ARGAZKIAK ikusteko

https://askemikel.blogspot.com/2023/05/otzarretatik-ugunako-ur-jauzira.html